منظومات

وہی لکھنے پڑھنے کاشوق تھا

‏وہی لکھنے پڑھنے کاشوق ہے

‏تیرا نام لکھنا کتاب پر

‏تیرا نام پڑھنا کتاب میں

انتخاب

۔۔۔۔۔۔۔۔۔۔۔۔۔   

ضرور تیری گلی سے گزر ہوا ہوگا...

 ‏ کہ آج  باد  صبا  بے قرار  آئی  ہے... 

 ‏کوثر نیازی 

۔۔۔۔۔۔۔۔۔۔۔۔۔۔۔۔

آنکھوں میں ستارے تو کئی شام سے اترے

پر دل کی اداسی نہ در و بام سے اترے

 

کچھ رنگ تو ابھرے تری گل پیرہنی کا

کچھ زنگ تو آئینہء ایام سے اترے

 

ہوتے رہے دل لمحہ بہ لمحہ تہہ و بالا

وہ زینہ بہ زینہ بڑے آرام سے اترے

 

جب تک ترے قدموں میں فروکش ہیں سبو کش

ساقی خطِ بادہ نہ لبِ جام سے اترے

 

بے طمع نوازش بھی نہیں سنگ دلوں کی

شائد وہ مرے گھر بھی کسی کام سے اترے

 

اوروں کے قصیدے فقط آورد تھے جاناں

جو تجھ پہ کہے شعر وہ الہام سے اترے

 

اے جانِ فراز اے مرے ہر دکھ کے مسیحا

ہر زہر زمانے کا تیرے نام سے اترے

احمد فراز

۔۔۔۔۔۔۔۔۔۔۔۔۔۔۔۔۔۔  

کل چودھویں کی رات تھی شب بھر رہا چرچا ترا 

کچھ نے کہا یہ چاند ہے کچھ نے کہا چہرا ترا 

 

ہم بھی وہیں موجود تھے ہم سے بھی سب پوچھا کیے 

ہم ہنس دئیے ہم چپ رہے منظور تھا پردہ ترا 

 

اس شہر میں کس سے ملیں ہم سے تو چھوٹیں محفلیں 

ہر شخص تیرا نام لے ہر شخص دیوانا ترا 

 

کوچے کو تیرے چھوڑ کر جوگی ہی بن جائیں مگر 

جنگل ترے پربت ترے بستی تری صحرا ترا 

 

ہم اور رسم بندگی آشفتگی افتادگی 

احسان ہے کیا کیا ترا اے حسن بے پروا ترا 

 

دو اشک جانے کس لیے پلکوں پہ آ کر ٹک گئے 

الطاف کی بارش تری اکرام کا دریا ترا 

 

اے بے دریغ و بے اماں ہم نے کبھی کی ہے فغاں 

ہم کو تری وحشت سہی ہم کو سہی سودا ترا 

 

ہم پر یہ سختی کی نظر ہم ہیں فقیر رہ گزر 

رستہ کبھی روکا ترا دامن کبھی تھاما ترا 

 

ہاں ہاں تری صورت حسیں لیکن تو ایسا بھی نہیں 

اک شخص کے اشعار سے شہرہ ہوا کیا کیا ترا 

 

بے درد سننی ہو تو چل کہتا ہے کیا اچھی غزل 

عاشق ترا رسوا ترا شاعر ترا انشاؔ ترا

 

ابن انشاء

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جب ترا حکم ملا ترک محبت کر دی 

دل مگر اس پہ وہ دھڑکا کہ قیامت کر دی 

 

تجھ سے کس طرح میں اظہار تمنا کرتا 

لفظ سوجھا تو معانی نے بغاوت کر دی 

 

میں تو سمجھا تھا کہ لوٹ آتے ہیں جانے والے 

تو نے جا کر تو جدائی مری قسمت کر دی 

 

تجھ کو پوجا ہے کہ اصنام پرستی کی ہے 

میں نے وحدت کے مفاہیم کی کثرت کر دی 

 

مجھ کو دشمن کے ارادوں پہ بھی پیار آتا ہے 

تری الفت نے محبت مری عادت کر دی 

 

پوچھ بیٹھا ہوں میں تجھ سے ترے کوچے کا پتہ 

تیرے حالات نے کیسی تری صورت کر دی 

 

کیا ترا جسم ترے حسن کی حدت میں جلا 

راکھ کس نے تری سونے کی سی رنگت کر  دی

 

احمد ندیم قاسمی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔